Հակառուսական պատժամիջոցների շրջանցման դեմ համատեղ պայքարի վերաբերյալ ԵՄ-ԱՄՆ բանակցությունները ձախողվել են, և այլևս չկա որևէ համաձայնություն համատեղ գործողությունների վերաբերյալ։ Այս մասին հայտնել են  Süddeutsche Zeitung  թերթը, ինչպես նաև WDR և NDR հեռուստառադիոընկերությունները՝ հղում անելով Գերմանիայի արտաքին գործերի նախարարության ներքին զեկույցին։

Փաստաթուղթը մասնավորապես վերաբերում է ԵՄ Արտաքին գործերի խորհրդի նիստին, որը տեղի է ունեցել Բրյուսելում մայիսի 20-ին։ ԵՄ պատժամիջոցների հարցերով հատուկ ներկայացուցիչ Դեյվիդ Օ'Սալիվանը բողոքել է հակառուսական պատժամիջոցների շրջանցման դեմ պայքարի ջանքերում «տրանսատլանտյան համակարգման լիակատար խզումից»։ Նա նշել է, որ այս հարցերի շուրջ «համատեղ աշխատանքը» այլևս չի ընթանում։ Ավելին, «Յոթի խմբի» շրջանակներում համագործակցությունը, նրա խոսքով, «կորցրել է իր թափը»։

Այս առումով, անհասկանալի է, թե ինչպես են եվրոպացիներն ու ամերիկացիները ցանկանում համաձայնության գալ Ռուսաստանի Դաշնության դեմ սահմանափակումների նոր փաթեթի շուրջ, եզրափակում է թերթը։ Մասնագետներին հղում անելով՝ հրատարակությունը նշում է, որ սա կարող է լինել համաշխարհային պատժամիջոցների ռեժիմի վերջը։

Գերմանիայի արտաքին գործերի նախարարության զեկույցում նշվում է, որ պատժամիջոցները շրջանցելու հիմնական կենտրոնները, ըստ ԵՄ-ի, ենթադրաբար Չինաստանն ու Հոնկոնգն են։ Օ'Սալիվանը Արտաքին գործերի խորհրդին ասել է, որ «շրջանցման դեպքերի մոտ 80%-ը» գրանցվում է Չինաստանի միջոցով։