Իսրայելական «The Jerusalem Post» (JPost) թերթի աղբյուրը պնդում է, որ Իրանը Օմանի և Կատարի միջոցով դիմել է Միացյալ Նահանգներին՝ խնդրելով Իսրայելին դադարեցնել Իսլամական Հանրապետությանը հարվածները: Նույն աղբյուրի համաձայն, Թեհրանը Վաշինգտոնին ազդանշան է տվել իր միջուկային ծրագրի շուրջ բանակցությունները վերսկսելու պատրաստակամության մասին, որոնք ընդհատվել էին Իսրայելի ռազմական գործողության պատճառով:

Բացի այդ, JPost-ի աղբյուրի համաձայն, Սաուդյան Արաբիայի իշխանությունները նույնպես ոչ հրապարակային քայլեր են ձեռնարկում բանակցային գործընթացը վերսկսելու համար։

Հրապարակումը նշում է, որ Վաշինգտոնն այժմ հրապարակավ պնդում է, որ Թեհրանը պետք է անվերապահորեն ընդունի ամերիկյան պայմանները, այդ թվում՝ Իրանի կողմից ուրանի հարստացումից լիակատար հրաժարումը։ Այս առումով, բարձրաստիճան իսրայելցի պաշտոնյան JPost-ի հետ զրույցում հույս է հայտնել, որ Իրանը կմերժի այս պայմանը, ինչը, ի վերջո, կդրդի Միացյալ Նահանգներին միանալ Իսլամական Հանրապետության դեմ Իսրայելի ռազմական արշավին։