Վերջին մի քանի տարիների ընթացքում Երևանը ձգտում է հավասարակշռության տարբեր ուղղություններով։ Հայտնի է, թե ինչ է բերում Եվրասիական տնտեսական միությանը (ԵԱՏՄ) անդամակցությունը Հայաստանին, տեսնենք, թե ինչ կբերի Եվրամիության հետ մերձեցումը, ասել է Ռուսաստանի նախագահի մամուլի քարտուղար Դմիտրի Պեսկովը։

ՀՀ վարչապետ Նիկոլ Փաշինյանը նախկինում հաստատել է, որ հանրապետությունը ցանկանում է դառնալ ԵՄ անդամ, բայց դա, ըստ նրա, բարդ գործընթաց է։

«Վերջին մի քանի տարիների ընթացքում մենք տեսել ենք տարբեր ուղղություններով հավասարակշռության հասնելու ցանկություն։ Մենք գիտենք, թե ինչ է բերում, օրինակ, ԵԱՏՄ անդամակցությունը Հայաստանին։ Տեսնենք, թե ինչ կբերի ԵՄ-ի հետ մերձեցումը։ Այստեղ ամեն ինչ հայտնի է համեմատության մեջ», - «Մայակ» ռադիոկայանին ասել է Պեսկովը՝ պատասխանելով այն հարցին, թե արդյոք Փաշինյանը վերջերս չափազանց կոշտ է խոսում։

Հունվարին Ռուսաստանի փոխվարչապետ Ալեքսեյ Օվերչուկը հայտարարել էր, որ Ռուսաստանը Եվրամիությանը միանալու մասին օրինագծի քննարկումը Հայաստանում դիտարկում է որպես ԵԱՏՄ-ից Երևանի դուրս գալու սկիզբ և իր տնտեսական քաղաքականությունը հանրապետության նկատմամբ կկառուցի՝ հաշվի առնելով այս հանգամանքը։