Ասել է Լևոն Զուրաբյանը Restart Civic-Youth Foundation-ի կազմակերպած երիտասարդների հետ հանդիպման ընթացքում հայտնել է.

«Լեռնային Ղարաբաղի ներկայացուցիչները և Հայաստանի քաղաքական վերնախավը չէր ընդունում ԵԱՀԿ Մինսկի խմբի առաջարկած և Լևոն Տեր-Պետրոսյանի կողմից օժանդակվող Ղարաբաղյան հակամարտության կարգավորման որևէ տարբերակ։ Հետևաբար, Տեր-Պետրոսյանը ասաց. «Ես հրաժարական եմ տալիս, ղեկավարեք երկիրը այն տարբերակով, որը ճիշտ եք համարում»։ Նա չէր պատրաստվում նախագահել մի քաղաքականություն, որի առաջնորդը ինքը չէր և որին ինքը չէր հավատում։ Հետևաբար, պիտի հրաժարական տար։

Հիմա Նիկոլ Փաշինյանը փորձում է հրաժարական տվող մարդկանց ներկայացնել որպես վախկոտ ու դասալիք, այնինչ հրաժարական տվող մարդիկ սկզբունքային մարդիկ են։

Շառլ դը Գոլը երկու անգամ հրաժարական է տվել՝ լինելով մեծագույն և ամենահամարձակ գործիչներից մեկը ֆրանսիական պատմության մեջ։ Երկու անգամ հրաժարական է տվել, երբ տեսել է, որ քաղաքական վերնախավը իր քաղաքականությունը չի ընդունում։ Ի՞նչ է, դը Գոլն է՞լ դարձավ դասալիք։ Ինչ-որ մեկը կարո՞ղ է համարձակվել նրան վախկոտ ու դասալիք անվանել:

Հի՛մարություն: 

Իսկ Նիկոլ Փաշինյանի համար որևէ գաղափարախոսություն սկզբունքային չէ։ Նա կարող է այսօր հանդես գալ որպես կոմպրոմիսային լուծման ջատագով, իսկ վաղը՝ դառնալ ամենածայրահեղ «ոչմիթիզիկանը»։ Նույնիսկ մեկ ասուլիսի ընթացքում կարող է արտահայտել իրար հակասող մտքեր։ Նրա հավատը կապված չէ ոչ մի գաղափարախոսության կամ սկզբունքի հետ։ Նրա մոտեցումը հետևյալն է՝ ասել այն, ինչը տվյալ պահին առավելագույնս դուր կգա ժողովրդին կամ ժողովրդի այն հատվածին, որի վրա հենվում է իր իշխանությունը»: