Հայաստանում Ամերիկայի Միացյալ Նահանգների ռազմական կցորդ, գնդապետ Մեթյու Քրոուն ներկա է գտնվել ՀՀ զինված ուժերի և Կանզասի ազգային գվարդիայի զինծառայողների մասնակցությամբ տեղի ունեցող ուսուցմանը՝  նվիրված բուժօգնության հարցերին։

Այս մասին հաղորդագրություն է տարածել ՀՀ-ում ԱՄՆ դեսպանությունը։ 

Միջոցառումն անցկացվել է «Զառ» ուսումնական կենտրոնում՝ «Արծիվ գործընկեր-2025» հայ-ամերիկյան զորավարժության շրջանակում։  

Զորավարժության ավարտին նախատեսվում է ԱՄՆ զինծառայողների և նրանց ռազմական տեխնիկայի վերադարձ դեպի ծառայության հիմնական վայր։  

«Արծիվ գործընկեր-2025» հայ-ամերիկյան զորավարժությունները մեկնարկել են օգոստոսի 12-ին և կեզրափակվեն օգոստոսի 20-ին։ 

Զորավարժությանը ներգրավված են ՀՀ ԶՈՒ խաղաղապահ բրիգադի, Եվրոպայում ու Աֆրիկայում ԱՄՆ ցամաքային զորքերի և Կանզասի ազգային գվարդիայի զինծառայողները:

Զորավարժության հիմնական նպատակներն են՝ խաղաղապահ գործողությունների շրջանակում միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակի բարձրացում, կառավարման և մարտավարական հաղորդակցման լավագույն փորձի փոխանակման իրականացում, ՀՀ խաղաղապահ ստորաբաժանման պատրաստվածության ամրապնդում:

Զորավարժությունը ներառում է նաև խաղաղապահ առաջադրանքների նախապատրաստում և իրականացում՝ բժշկական տարհանման ընթացակարգերի շեշտադրմամբ։