Ռուսաստանի նախագահ Վլադիմիր Պուտինը հույս է հայտնել, որ այն «ըմբռնումները», որոնց հաջողվել է հասնել Ալյասկայում ԱՄՆ ղեկավար Դոնալդ Թրամփի հետ կայացած բանակցություններում,  կնպաստեն ռուս-ուկրաինական հակամարտության կարգավորմանը։ «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը:

«Մենք բարձր ենք գնահատում Չինաստանի, Հնդկաստանի, մեր մյուս ռազմավարական գործընկերների ջանքերն ու առաջարկները, որոնք կոչված են նպաստելու ուկրաինական ճգնաժամի կարգավորմանը։ Ըմբռնումները, որոնք ձեռք են բերվել Ալյասկայում վերջերս կայացած ռուս-ամերիկյան բարձր մակարդակի հանդիպմանը, հուսով եմ, նույնպես ընթանում են այդ ուղղությամբ՝ բացելով խաղաղության տանող ճանապարհն Ուկրաինայում», - ասել է Պուտինը՝ ելույթ ունենալով Շանհայի համագործակցության կազմակերպության գագաթնաժողովում։

«Այսօր և վաղը նախատեսված երկկողմ հանդիպումների ժամանակ ես, անշուշտ, ավելի մանրամասն և հանգամանորեն կտեղեկացնեմ իմ պաշտոնակիցներին Ալյասկայում կայացած բանակցությունների արդյունքների մասին», - հավելել է նա։

Անդրադառնալով ռուս-ուկրաինական հակամարտությանը՝ ՌԴ նախագահը նշել է, որ այն կարող է կայուն և երկարաժամկետ կարգավորվել միայն այն դեպքում, երբ վերացվեն դրա սկզբնապատճառները:

«Որպեսզի ուկրաինական կարգավորումը կրի կայուն և երկարաժամկետ բնույթ, պետք է վերացվեն ճգնաժամի սկզբնապատճառները, վերականգնվի արդարացի հավասարակշռությունն անվտանգության ոլորտում», - ասել է Պուտինը: