Լրագրողներն այսօր ՀՀ արտաքին գործերի փոխնախարար Վահան Կոստանյանից հետաքրքրվեցին՝ Արցա՞խն է ազատագրել, բանակո՞ւմ է ծառայել, որ «Հայրենիքին մատուցած ծառայությունների համար» 1-ին աստիճանի շքանշանով է պարգևատրվել։

«Ինքս չեմ սիրում խոսել այն աշխատանքի մասին, որն իրականացրել եմ, ենթադրում եմ՝ մի օր դրա մասին ավելի հայտնի կդառնա»,- լրագրողների հարցին ի պատասխան՝ ասաց ԱԳ փոխնախարարը։

Կոստանյանը կարծում է, որ դիվանագիտական ծառայության միջոցով նույնպես կարելի է հայրենիքին ծառայություն մատուցել, իսկ թե երբ է տեղի ունեցել այդ պարգևատրումը,  տրամաբանորեն հուշում է ինչի համար է ստացել։

«Ես շնորհակալ եմ նման բարձրագույն պարգևի արժանացնելու համար»,- հավելեց ԱԳ փոխնախարարը։

Անդրադառնալով պատերազմի մասնակիցների կողմից պարգևների հետ հանձնմանը՝ նա նշեց, որ կա հստակ պռոցեդուռա, որով շնորհվում են այդ մրցանակները։