Հայաստանի կանանց բռնցքամարտի հավաքականի անդամ, Եվրոպայի չեմպիոն Անի Հովսեփյանը պրոֆեսիոնալ ռինգում հաջորդ մենամարտը կանցկացնի 2026 թվականի մարտին:

«Արմենպրես»-ի թղթակցի հետ զրույցում այս մասին ասել է բռնցքամարտիկը:

Անի Հովսեփյանի հաջորդ մրցակիցը Հարավաֆրիկյան Հանրապետության ներկայացուցիչ Նոցիպհո Բելլն (Nozipho Bell) է: Այդ մենամարտը նույնպես կկայանա Հայաստանում` 2026 թվականի մարտին:

«Մեծ է հավանականությունը, որ այդ մենամարտում հաղթելու դեպքում հնարավորություն կստանամ մենամարտելու WBC Silver գոտու համար»,-ավելացրել է Հովսեփյանը:

Անի Հովսեփյանը պրոֆեսիոնալ ռինգում այս պահին կանանց հավաքականի միակ անդամն է ու անկախ Հայաստանի միակ Եվրոպայի չեմպիոնը կանանց բռնցքամարտում: Նրա անդրանիկ մենամարտը պրոֆեսիոնալ ռինգում կայացել է 2025 թվականի հոկտեմբերին` Երևանում, որտեղ նա հաղթել է Սերբիայից Քսենյա Մեդիկին: